امنين اجيت

موضوع: امنين اجيت الجمعة يوليو 30, 2010 11:39 pm

امنين اجيت الدنيا مو دنية عشك يبن الحلال
لا تخلينه بمحبتك ننجبر

انت ابن العافية وابن الدلال
واحنه ولد الموت ربانه الفقر

بينه وبينك فرق كلش جبير
وما نكول اسباب كل هذا الفرق

وما نكمل السالفة لحد الاخير
امن الاساس وياك مسدودة الطرق

وياك ما نرهم وما ترهم محال
ويانه ما تكدر تدوم وتستمر

وياهو كلك بالسهل درب الوصال
وانت تدري دروبنة مورثة جمر

*-*-*-*-*-*-*-*-*
امنين اجيت وبالعشك عندك يقين
امنين اجيت وياهو سوالك درب

انطيني مهله وخل اشوفن دربي زين
وخل اشوف انوب هم اكدر احب

كلبي تيهته وشرد ما ادري وين
وانه صار اسنين ما عندي كلب

وخالي كلبك وانت بعيونك جمال
كل جمال الكون يمك يعتذر

نبع شفتك يعني كلماتك زلال
والعطش بالروح تارك جم فطر

*-*-*-*-*-*-*-*-*
امنين اجيبنلك خلك يرهم عليك
وانت ايه امن الحسن واحلى الدلع

وانه يا فرحه الاحطها بين اديك
وانه بجفوفي عمر شلت الوجع

حتى ما عندي ابتسامة امنرد اجيك
وليش تشلع كلبك بكلب انشلع

وليش تطلع خاسر ومشلول حال
وتترك الضحكة وعليمن تنقهر

راجع افكارك بعد عندك مجال
ليش بيه تريد كلبك ينكسر

*-*-*-*-*-*-*-*-*
ادري بيك تحبني ما داعي الكلام
وادري بدموعك صدك تبجيلي

من تجيني لا تكلمني بغرام
عفية عوف الشوك لا تحجيلي

انه ليلي بلاية واهس ما انام
اشلون لو صرت انت واهس ليلي

واشلون لو حبيت طولك والخصال
واشلون لو باجر تروح وتعتذر

هم ترد لمن اكللك تعال
وتنتظر لمن اكلك انتظر

*-*-*-*-*-*-*-*-*
احنه عدنه الحب يعني الحب عذاب
ولازم امن ننحب نذب بالحب فلك

ولازم نحب باب بيتك والتراب
ونحب كلشي العايد وراجع الك

ونحب ناسك كلها شيب اويه الشباب
ولازم نحب كل عمامك وي هلك

ولازم نحبك نحب الخال خال
وكل هذني اشويه لتكول اشكثر

احنه ما عدنا العشك صفنه وخيال
احنه من نحب نطك وننفجر

*-*-*-*-*-*-*-*-*
انخاف من حبك لان حبك جديد
ذهب جنه وياهو اليشوفة انعجب

والمشاعر (فقرة) معضدها حديد
وانت يم (الفقرة) لا تطلع الذهب

وياك ما نصقل بعد لا ما نعيد
عوفنه ولتكول بينولي السبب

احنه ما عدنه جواب لأي سؤال
لان من شفناك تيهنه الفكر

هم شفت فد يوم كالوا للدلال
ليش متحمله حضن نار الجمر

الدنيا مو دنية عشك يبن الحلال
لا تخلينه بمحبتك ننجبر

انت ابن العافية وابن الدلال
واحنه ولد الموت ربانه الفقر
[img:37a3][ندعوك للتسجيل في المنتدى أو التعريف بنفسك لمعاينة هذا الرابط]

__________________

موضوع: رد: امنين اجيت الإثنين أغسطس 09, 2010 3:01 pm

مشكووووووووووووووور حبيبي

الغالي حيدوووووووووووووري

موضوووووووووووووووووووووووع جدا مميز لارق كلمااااااااااااااااااااات

يسلموووووووووووووووووووو
يااشااعر الفيحاء